Fyrsta námskeiðið í smíði trébáta á árinu eru nú (26-27 febrúar 2016) haldið húsnæði Iðu fræðsluseturs (idan.is)  að Vatnagörðum 20 í Reykjavík en námskeiðið er haldið í samvinnu Iðu fræðsluseturs og FÁBBR. Þáttakendur að þessu sinni eru 8. Kennarar eru sem fyrr Hafliði Aðalsteinsson skipasmíðameistari og Eggert Björnsson bátasmiður.

Verkefnin að þessu sinni er kennsla í viðgerð á gömlum bát og frágangur á nýjum bát.

Eldri báturinn er bátur sem Valdimar Ólafsson (1906-1939) í Hvallátrum (afabróðir Hafliða) smíðaði árið 1934 fyrir Júlíus Sigurðsson(1876-1961) á Litlanesi á Barðaströnd og var báturinn yfirleitt kallaður Litlanesbáturinn og var hlunnindabátur á Litlanesi í áratugi. Hafliði er að vinna að endurbyggingu bátsins fyrir Hilmi Bjarnason stjórnarmann í FÁBBR.

Sigurjón Árnason (1923-2010) skipasmiður í Flatey, afi Hilmis, smíðaði á árunum um og eftir 1950 fjóra báta eftir Litlanesbátnum; Andvara, Bjarma, Hring og Múlabátinn. Þessir bátar eru allir til í dag og eru allir nema Andvari í mjög góðu ástandi.

Myndir frá námskeiðinu eru í myndaalbúmi. http://www.batasmidi.is/photoalbums/277391/

Eins og fram koma hér á síðunni í september þá bættist vélasafn Þórhalls Matthíassonar frá Litlabæ í Skötufirði við Báta- og hlunnindasýninguna á Reykhólum.

Nú hefur safnið verið skrá eftir upplýsingum frá Þórhalli.

Ýmislegt fróðlegt kemur í ljós við skráningu safnsins.

Vélarnar eru alls 102 af 42 tegundum og eru framleiddar í 8 löndum. Ekki er vitað um aldur allra vélanna en af þeim sem vitað er um er elsta vélin frá 1926 og sú yngsta frá 2001. Notkun vélanna hefur verið mjög fjölbreytt en um 80% eru báta- eða ljósavélar. Vélarnar koma víða að, rúmlega helmingur er af Norðurlandi og um þriðjungur af Vestjörðum, Breiðafirði og Vesturlandi.

Í haust var unnið að því að gera húsnæði tilbúið fyrir sýninguna og gekk það vel og í vor verður safnið sett upp ásamt merkingum.

Við viljum hvetja alla áhugamenn að gera sér ferð á Reykhóla næsta sumar og skoða þetta stór merka safn.

Hér á eftir fylgja nokkrar töflur fyrir áhugasama að skoða betur.

Sindri afhentur Bátasafni Breiðafjarðar til eignar og varðveislu.

Sindri var smíðaður árið 1936 af Valdimar Ólafssyni í Hvallátrum fyrir Jón Þórðarson og Snæbjörn Jónsson á Stað á Reykjanesi. Á þessum tíma var tvíbýli á Stað en síðar(1949) byggði Jón nýbýlið Árbæ .

Sindri er smíðaður úr eik og furu og skráður 2,5 brl. Var upphaflega með 5 ha Skandia vél, árið 1946 var sett í bátinn 8 ha. Skandia vél, 1983 var sett í bátinn 8 ha Sabb vél og 1995 10 ha Sabb vél sem er í bátnum í dag.

Sindri var notaður af Staðar og Árbæjar bændum í áratugi við hlunnindanytjar og flutninga á vörum og fólki.

Sindri hefur verið geymdur í uppsátri á Vesturnesi við höfnina á Stað.

Árið 1962 kaupir Guðmundur Theódórsson á Laugalandi við Þorskafjörð bátinn og notar hann við hlunnindanytjar o.fl.  Árið 1990 gerði Guðmundur bátinn upp og hefur síðan haldið honum mjög vel við.

Á Bátadögum 2015 sigldi Guðmundur ásamt gestum á Sindra í hópi báta í blíðu veðri. Að því loknu afhenti Guðmundur Bátasafninu Sindra til eignar og varðveislu.

Sindri var hafður til sýnis á Báta- og hlunnindasýningunn fram á haust en nú hefur verið gengið frá honum til vetrardvalar í naustinu þar sem hann hefur verið geymdur undanfarin 80 ár.

Fleiri myndir af Sindra eru í myndaalbúmum.

Þórhallur Matthíasson sem er Vestfirðingur að uppruna, alinn upp í Skötufirði í Ísafjarðardjúpi, og búsettur á Akureyri hefur safnað og gert upp bátavélar í tugir ára. Árið 2007 opnaði Þórhallur sýningu á safninu á Akureyri.

Að undanförnu hefur Þórhallur verið að leita að framtíðarstað fyrir safn sitt. Fyrir stuttu komust á viðræður forsvarsmanna Bátasafns Breiðafjarðar og Þórhalls um hvort möguleiki væri á að safn Þórhalls myndi geta átt sér framtíðarstað á Reykhólum.

Eftir að við höfðum ráðfært okkur við félaga okkar hjá Báta- og hlunnindasýningunni ehf. (BogH) var ákveðið að þiggja þessa rausnarlegu gjöf Þórhalls og búa henni veglegan stað í kjallara húsnæðis BogH.

Safnið var síðan í framhaldinu flutt frá Akureyri í vikunni (16-17 sept.) til Reykhóla og þurfti tvo stóra flutningabíla undir safnið sem telur um 150 vélar og annan búnað sem tengist vélum í bátum. Margar vélanna eru gangfærar. Safninu var komið fyrir til bráðabirgða innan um báta og aðra sýningarmuni í BogH.   

Veturinn verður notaður til að undirbúa húsnæðið, leggja í gólf, mála og koma rafmagni og öðru í gott horf.

Næst vor verður sýningin svo sett upp í samvinnu við Þórhall og verður hún með hans nafni. Þórhallur hefur haldið skrá yfir alla munina og er saga þeirra flestar einnig aðgengileg.

Það má því segja að næst vor samanstandi  BogH í raun af 3 sýningum;  Bátasafn (súðbyrðinga), Hlunnindasafn og Vélasafn. Það er ósk okkar og von að þetta auki aðsókn að safninu.

Myndir af sýningu Þórhalls á Akureyri og af flutningunum í vikunni má sjá í myndaalbúmi.

Bátadagar 2015 tókust með miklum ágætum og átti gott veður sinn þátt í því.

Alls tóku sex bátar þátt að þessu sinni, Baldur, Bjargfýlingur, Gustur, Kári, Ólafur og Sindri og þáttakendur voru um 25 talsins.

Við sem að þessari hátíð súðbyrðingsins stöndum hefðum kosið að fleiri hefðu komið með báta sína og siglt með okkur en það er töluverð fyrirhöfn að koma með bátana og við höfum skilning á því að svo varð ekki að þessu sinni. Vonandi verða fleiri næst.

Við hjá FÁBBR og Báta- og hlunnindasýningunni viljum þakka öllum þeim sem hjálpuð okkur að gera þessa hátíð jafn góða og raun bar vitni.

Mikið hefur birst af myndum á vefnum og umfjöllun um Bátadagana og eru krækjur á það hér að neðan.

Reykhólavefurinn: 

http://reykholar.is/frettir/Einstok_blida_a_Batadogum_2015_-_urmull_mynda/

http://reykholar.is/myndasofn/myndir/179/

Báta- og hlunnindasýningin:

https://www.facebook.com/permalink.php?story_fbid=666927983441856&id=313189945482330

Goddur:

https://www.facebook.com/goddur55/media_set?set=a.10153479256586907.1073741935.537701906&type=3&pnref=story

Haukur Sigvaldason:

https://www.facebook.com/shaukur/media_set?set=a.10205641638138283.1073742002.1173871807&type=3

https://www.facebook.com/shaukur/media_set?set=a.10205667421462850.1073742003.1173871807&type=3&pnref=story

Eftir vikufrestun vegna veðurs voru Bátadagar á Breiðafirði haldnir dagana 12. og 13.  júlí sl.

Fyrri hluti laugardagsins var nýttur til að sjósetja og prófa bátana sem margir höfðu ekki verið hreyfðir frá síðustu Bátadögum fyrir tveim árum. Bjart var í veðri en nokkuð stíf NA átt. Þegar hálffallið var að um kl. 16 var lagt af stað á 8 bátum undir styrkri leiðsögn heimamanna og siglt um Reykhólaeyjar að Hvalshaushólma þar sem talið er að Grettir og félagar hafi komið að landi með nautið sem Grettir bar síðan á bakinu heim að bæ. Þarna eru merki um naust og fleiri minjar. Síðan var siglt að Nóney sem er afar falleg stuðlabergseyja. Eftir að hafa skoðað Nóney var ferðinni fram haldið í átt að Miðjanesi og siglt að Miðjanesey og síðan með landinu um Staðareyjar og endað í höfninni hjá Stað. Alla leiðina var siglt á mjög grunnu vatni og á fjöru má víða ganga þar sem siglt var. Vindinn herti heldur og var þetta 10-15 m/sek. Það reyndi því aðeins á og vélar í tveim bátanna biluðu smávegis. Nánar má sjá leiðina á meðfylgjandi korti og einnig hér: http://www.sports-tracker.com/#/workout/sberg/627tiv8v6tbue9th

Eftir að hafa komið bátunum vel fyrir og tekið þá sem biluðu á land var haldið til Reykhóla. Um kvöldið var sameiginlegt grill í húsnæði Báta- og hlunnindasýningarinnar.

Á sunnudag var komið mun betra veður og um kl. 14 var siglt á 5 bátum og byrjað á því að sigla inn á Djúpafjörð og hann skoðaður, síðan var siglt inn í Þorskafjörð að Teigsskógi. Vegna sjávarstöðu var ekki hægt að fara þar í land og var þá siglt yfir að Laugalandi sem er eyðijörð við sunnanverðan Þorskafjörð. Húsráðendur tóku á móti bátafólkinu og sýndu staðhætti en á Laugalandi er heitur hver og er vatn úr honum nýtt til húshitunar og í sundlaug. Að lokum var siglt til Staðar þar sem bátarnir voru teknir á land og menn héldu hver til síns heima eftir vel heppnaða Bátadaga.  

Félag áhugamanna um Bátasafn Breiðafjarðar (FÁBB) í samvinnu við Báta- og hlunnindasýninguna á Reykhólum (BogH), gengst nú fyrir bátahátíð súðbyrtra trébáta á Breiðafirði í sjötta sinn þann 5 og 6 júlí nk. Eru eigendur trébáta hvattir til að mæta með báta sína.

 Föstudagur 4. Júlí.  Safnast saman.

Ráðgert er að þáttakendur safnast saman á Reykhólum á föstudaginn 4 júlí. Góðar aðstæður til gistingar eru á svæðinu. Ef aðstæður leyfa verður möguleiki á að þáttakendur grilli saman á föstudagskvöldinu.

 Laugardagur 5. Júlí. Leikur og alvara í og við Reykhólahöfn.

Á laugardagsmorgun verður mætt í Reykhólahöfn og bátarnir sýndir. Notaðar verða árar, segl og vélar eftir því sem aðstæður leyfa. Sérstaklega verður hugað að yngstu kynslóðinni og henni m.a. kennt/sýnt að róa. Kunnáttumenn verða á svæðinu og kynna mismunandi báta og skýra notkun þeirra við dagleg störf við Breiðafjörð í gegnum aldirnar. Háflóð er um kl. 12:30 á laugardag. Stefnum á sameiginlegt grill um kvöldið.

Sunnudagur 6. Júlí. Sigling í Þorskafjörð.

Á sunnudaginn 6 júlí verður siglt frá Reykhólahöfn um kl. 10:00 og siglt NV með Reykjanesi um Staðareyjar og inn Þorska-, Gufu- og Djúpafjörð og aðstæður skoðaðar, áð verður við Teigsskóg og hann skoðaður, síðan verður siglt til Staðar á Reykjanesi og líkur ferðinni þar. Gera má ráð fyrir að ferðin taki 6-8 klst.   Á meðfylgjandi yfirlitsmynd má sjá fyrirhugaða siglingaleið. Háflóð er um kl. 13:30 á sunnudag

Báta- og hlunnindasýningin verður opin alla dagana. http://visitreykholahreppur.is/page/34165/

Að sjálfsögðu ráða aðstæður, sjávarföll og veður, mestu um hvernig siglingarnar verða og áætlunin getur því breyst ef aðstæður krefjast. Siglingin verður undir stjórn manna sem þekkja vel til aðstæðna við Breiðafjörð. Formaður hvers báts er ábyrgur fyrir því að nauðsynlegur öryggisbúnaður sé fyrir hendi um borð. Allir súðbyrðingar er velkomnir og við viljum hvetja sem flesta til að nýta sér þetta tækifæri til siglingar um þetta fallega umhverfi.

Mjög góð aðstaða fyrir minni báta er á Reykhólum og á Stað og einnig er mjög góð aðstaða fyrir ferðamenn í Reykhólasveit. Sjá nánar  á www.visitreykholahreppur.is/

Frekari upplýsingar veita: Harpa Eiríksdóttir, [email protected],  s: 894 1011 og Sigurður Bergsveinsson, [email protected], s: 893 9787